必食大大粒手打肉丸

整個雞煲的雞肉份量絕不手軟，隨便一撈就有超多雞肉。招牌香辣雞煲食落夠晒惹味，而且相當足料。

雖然雞煲內本來就有豬紅，但亦忍不住叫多一碟，份量超大！

作為食肉獸，肥牛和鮮牛肉都要食！

手打肉丸大大粒又彈牙，咬落更有冬菇粒及馬蹄等，超有口感。

食得多四川火鍋，是時候回歸屬於我們港澳風味的火鍋啦！位於十月初五街的「龍門辣雞煲」，相信有留意開雞煲界的朋友絕對不陌生，早已是不少本地人推薦的必食雞煲。店鋪並無太多花巧裝潢擺設，勝在有足料惹味的雞煲及各式配料，擄獲許多食客的芳心。一坐低即時點個招牌的香辣雞煲，見到紅色的湯底先不用害怕，辣度絕對是寶寶級食辣人士都接受到，回到重點，當然是雞肉，食落入味又不怕柴，再點上腐乳，惹味加倍！清空完雞肉，就把整個湯底當成打邊爐，叫上各式火鍋料一同滾上，鮮牛肉、肥牛、肉丸、豬紅等樣樣都要有齊，當中強烈推介必點的，絕對是手打肉丸，彈牙之餘內裡更有寶藏，食落帶有冬菇粒、馬蹄等，令到口感倍增！(文、圖:梁查理)