手撕雞（ 上）
手撕雞（ 上）
凌晨的風，帶點腥，吹遍了整個小城，也吹散了一夜的勞累。我一如既往，下班後到烏記吃個早點，順便碰碰運氣，看能不能碰到一些好友，共聚早餐。烏記，是黑沙環一家歎早茶的老字號，老闆成哥的蒸牛肉球，更是遠近馳名的招牌菜，每天不用一小時，便能全部售罄，但今天，卻是個例外。
「成哥，今天咁多牛肉球？」我笑著說。「今日新聞一出，無人食肉，尤其牛肉同嗰啲。」成哥搖搖頭，用手指著店內的手撕雞說。「哈。我每樣要一份。」我點了菜，轉身望了望店內，不出我所料，果然有老友在等著我。
「水鬼偉，今晚咁夜？」我學堂時的兄弟，神槍手阿豪說。「哇！你今天唔係收早咩？咁夜都唔瞓？」我坐在他旁邊說。
「嗰單案，我負責跟。」阿豪喝了口茶，繼續說：「真攞命，查案查到無胃口。」「聽講好兇殘。」我輕聲地問。
「何止兇殘，直頭變態。頂，一講起又唔想食。」阿豪放下筷子，又說：「初步分析，兇手先用毒品令死者失去知覺，再活生生將肉一塊一塊切成肉碎，有部分可能用手撕，然後將內臟和肉掉入廁所沖走。」
「嘩，真係好變態。」
「你知唔知，我哋一入去間房，就覺得周身唔自在，又腥又臭，啲血漬成地都有。最慘係重要落去坑渠執啲屍肉，當時我攞起死者個肺，硬係覺得啲肉喺度掙扎緊。」
「咁啲骨呢？」
「啲骨同個頭重未搵到。我哋分析過，可能係兇手攞走，分分鐘掉咗落海。」
「唔係啊？咁大整蠱。」聽完他的描述，我突然放下筷子，不想再吃。「咦，係喎，掉落海，聽日就到你哋出動。」
「都無計，做得呢行。」「所以你要撈人頭上來，為死者討個公道。」「咁兇手搵到未？」我喝了口茶，再問。「梗係未啦，少少頭緒都冇。」「死者係咩人？」我問。
「暫時未肯定，推測係上邊落嚟賣淫。」
「咁可能係姦殺。」
「唔一定，根據酒店員工講，間房由兩個女仔租用。唔排除錢銀關係。」阿豪將嘴巴靠向我，放輕聲線說。「又可能，兩名女子都遇害！」
「點解咁講？」阿豪好奇地問。「直覺，我直覺一向好準。」我說話時，傳呼機突然傳來一條上司的訊息。
「哈，唔阻你出動啦。」阿豪說話後，站起身來，把我的單子搶在手中，走到櫃臺前結賬。「喂，我自己找數。」我也走到前臺。
睡了不到四個小時，還是睡不著，與其說是睡，倒不如說是閉目養神，自從收到要下海打撈頭顱的事，整晚就像有心事一般，難以入睡。偶而入夢，眼前馬上出現一名死狀恐怖的長髮女子，從遠處向我撲過來，不，不是女子，是女子的頭顱才對。我想，這肯定是和今天那件轟動全城的案子有關，因為日思夜想，才會連做夢也被自己幻想出來的女受害者纒著。說來也奇怪，我從事這工作，也快十年了，撈屍不下百具，理應來說，是「見慣世面」，為何這次會如此心有不安？唉，真的不能再想下去，要不然，也不用睡了，或者就直接起床，把掛在心中的事解決了，再回家睡一大覺，我覺得這是最好的解決方法，因為更煩的事，已在門外。
「B 仔，食白粥喇喂！」那把既親切又讓人煩躁的聲音說。
「阿媽，講過幾多次，瞓緊唔好嘈住。」我不耐煩地說。
「為你好啫，一啲都唔領情。」「係喇係喇，食埋返工。」我一邊從房間走到廁所。
「今日早少少返工，你啲同事搞唔掂啊。」「你又知？」我刷著牙問。
「新聞都有講，今朝員警落海搵頭。」「咁就好，希望到我返工前就搵到。」我刷完牙，走到餐桌上說。
「食埋就返去幫手。」媽媽把一塊玉吊墜掛在我頸上，接著說：「記唔記得你細細個，媽媽就一直話你會當差？」「記得，呢份工都係你幫我報名。」我吃了口粥，說。
「件事係咁，你阿嫲當年係個問米婆，出名生神仙。你出世嗰年，阿嫲同你算過，你註定食皇家飯，而今年對於你嚟講，係好特別，因為你會有一個大劫。」
「阿媽，呢啲嘢你都好信。」
「唔到你唔信，阿嫲話你三十有二之年，會重遇上一世情人。佢上世背夫偷漢，今世註定慘死。」
「阿媽，我一年起碼都執幾件，你又知係今次？」
「邊次都好，總之一定要戴住塊玉，有咩事就用手捉緊塊玉，呢個係阿嫲死前千叮萬囑。」
「得得得，唔同你講，我要出門。」我把粥吞進肚內。
從家到部門，騎電單車只需要十五分鐘，雖然距離正式上班還有一段時間，但不知為何，內心總是想早點回去幫手。我知道，需要盡快找到，各位同事才可以安心回家。
正如我所料，一進房門，便會看到上司焦急的樣子，每次有大事情，他都是坐立不安的模樣。
「水鬼偉，咁早返嚟做咩？」
「知有大件事發生，又瞓唔著，早啲返嚟睇下。」
「即係想加班啦。」上司笑了一下，接著說：「不過你唔返，都會叫你返。全隊你最好彩，同嗰味嘢特別有緣。」
「目前咩情況？」我急不及待地問。
「收到消息，死者係兩個人，即係要搵兩個頭。今朝凌晨，鯊魚隊人去舊橋嗰邊搵。青蛙隊人去媽閣廟一帶搵。你去舊橋嗰邊啦。」
「收到。」我自信地說。「你等我好消息。」我說話後，行了個禮，轉身準備走出房口。
「等陣。」上司說話後，走到我的身旁，接著說：「誠心少少上炷香畀關二哥先行。」
「乜你幾時都咁迷信。」
「寧信其有，不信其無。死者怨氣好重，我都係為你好。」
「我明白，多謝關心。」我說話後，走出房門，把裝備整理好，走到關二哥面前叩了個頭，然後走出門外，上了出發的車。
寫作要求： 需以澳門本土發生的真人真事、離奇案件、靈異事件為題材。
字數限定： 一篇約2,000字（ 可分上下篇）
刊登稿費： 薄酬投稿
郵件： exmoonews@uogroup.com
截稿日期： 8月14日下午6時
刊登日期： 經評選後，將於農曆七月十四日（9月4日）當天於《力報》副刊專欄版刊登冠軍作品，其後逢周三刊登未獲選之優秀作品。
